Së fundmi është folur shumë për çmimin e referencës, por edhe për taksat e pasurive të paluajtshme. Nisur nga ky shkak, podcasti i tretë i Future Home, i dedikohet pikërisht këtyre dy temave, me mjaft rëndësi për t`u trajtuar dhe sqaruar për audiencën e gjerë. Për të diskutuar rreth tyre këtë herë ishin të ftuar: Drejtori Ekzekutiv i NAREA, Renaldo Pipiria, Shahin Islamaj, Broker në Future Home Alpha, në zonën e Freskut dhe Alket Bogdani, agjent imobiliar në Future Home Opportunity.

Brokeri i Future Home Alpha, Shahin Islamaj sqaroi në podcast se çfarë është çmimi i referencës dhe si ndikon ky çmim në procesin e shitjes së pronës.

“Referenca është çmimi minimal, çmimi dysheme i kryerjes së transaksionit në shitje. Ky çmim vendoset nga shteti. Ka patur disa ndryshime në çmimin e referencës. Ndryshimet më të mëdha kanë prekur zonat që kanë marrë më shumë zhvillim gjatë 5 viteve të fundit, si Fusha e Aviacionit dhe Unaza e Re, të cilat patën përkatësisht rreth 54% dhe 48% ndryshim në çmimet e referencës. Këto ndryshime kanë qenë të lidhura drejtëpërdrejtë dhe me ndryshimet që kanë ndodhur në kohë në çmimet e tregut, të cilat sigurisht variojnë sipas zonave”, sqaroi Islamaj.

Rritja e çmimit të referencës ka qenë më e madhe në zonën e Farkës, ku çmimi i referencës është rritur me 73%. Rritje të madhe ka patur edhe në Lundër.

Agjenti imobiliar i Future Home Opportunity, Alket Bogdani, pohon gjithashtu se ka patur një rritje të çmimit të referencës, por edhe të pronave në Tiranë.

Ndiq Future Home Podcast në Instagram

“Zhvillimi urban dhe zhvillimi i Tiranës në përgjithësi ka çuar në rritjen e çmimeve në të gjitha zonat. Duke qenë se ka patur një rritje të çmimeve në të gjitha zonat ishte e nevojshme dhe rritja e çmimit të referencës”, u shpreh ai.

Drejtori ekzekutiv i NAREA, Renaldo Pipiria sqaroi më gjerë procesin e rivlerësimit të pronave, gjithashtu propozoi një reduktim të taksës së shitjes së pronës, pasi sipas tij, kjo do të rriste transparencën në deklarimin e vlerës së saj nga vetë pronarët.

“Fushatat e rivlerësimit nuk janë fort të përkrahura nga institucionet ndërkombëtare sepse shikohen si amnisti fiskale, pra si lejim i formalizimit të diçkaje që ka qenë e paformalizuar. Fushatat e rivlerësimit nuk mund të jenë më të gjata se 9 muaj gjatë një viti. Fushatat e rivlerësimit janë efiçente, por jo gjatë gjithë kohës. Nuk mund të mbahen gjatë gjithë kohës. Atëhere duhet filluar të ndërhyhet në tatimin që ka të bëjë mbi fitimin kapital. Nga 15% që është sot, duhet të shkojë maksimumi 5%. Kjo do të shtynte këdo që tregton pasuri të paluajtshme të shkojë dhe të deklarojë vlerën reale që ka prona pa u shqetësuar se sa shumë duhet të paguajë. Pra nuk ka nevojë të gënjëjë sepse do të paguajë 5% në fund të ditës”.

Por si bëhet llogaritja e taksës së një prone? Këtë e shpjegon agjenti imobiliar i Future Home, Alket Bogdani, i cili përballet në rutinën e tij profesionale vazhdimisht me këtë çështje.

“Llogaritet çmimi fillestar i blerjes së pronës dhe çmimi me të cilin po shitet. Në lojë futet edhe çmimi i referencës. Nëse çmimi i shitjes është nën çmimin e referencës, përllogaritja e taksës që duhet të paguajë pronari bëhet duke marrë parasysh çmimin e referencës dhe çmimin e pronës në momentin që është blerë prej tij, pra 15% të kësaj diference. Nëse çmimi i shitjes është më i lartë se ai i referencës, ai duhet të paguajë 15% të diferencës të çmimit të shitjes me çmimin e blerjes.                                                                                                              Taksimi 15% ka ndikuar që të gjithë shitësit të duan që vlerën e taksës ta kalojnë direkt te blerësi. Prandaj ka dhe blerës të pakënaqur në lidhje me çmimet”, tregon Alketi.

Rritja e çmimit të referencës dhe taksimi i pasurive të paluajtshme. Ndiq episodin e tretë të podcastit.

Sipas tij klientët sot janë më të edukuar për çështjet që kanë të bëjnë me shit-blerjen e një prone. I njohin më mirë detyrimet dhe përgjegjësitë e tyre.

“Ka patur një zhvillim të kulturës së njerëzve në lidhje me taksat dhe pjesën e shpenzimeve që ata kanë për shitjen e pronës. Kjo na e ka lehtësuar punën në njëfarë mënyre, por akoma janë të shumtë ata që thjesht duan të fusin paratë e tyre në xhep, pa iu interesuar detyrimet që kanë. Megjithatë, ecuria e klientëve në këtë drejtim është përmirësuar, sa vjen dhe janë më të informuar. Kemi patur dhe ne si agjentë imobiliar ndikim në edukimin e tyre, duke i informuar për detyrimet dhe përfitimet që kanë. Kuptimi i procesit prej tyre, na e ka lehtësuar edhe ne pjesën e ndërmjetësimit dhe të transaksionit”, vijoi ai.

Pipiria nga ana tjetër, si ekspert i fushës, tregon dhe përvojat e disa vendeve europiane në lidhje me taksat dhe lehtësirat që ata kanë.

“Në vendet europiane tregtimi i pasurive të paluajtshme të cilat shërbejnë si rezidenca parësore, si vendbanim parësor, është i përjashtur nga taksimi. Nëse unë e kam mbajtur banesën për 5-vjet dhe dua të shpërngulem diku tjetër dhe të rris mirëqenien, të zgjedh një zonë tjetër banimi për të jetuar, nuk taksohem. Aplikimi i taksës zero në këtë rast më ndihmon mua si shitës, por edhe blerësin, të cilit do i rritej çmimi nëse nuk do të praktikohej një metodë e tillë lehtësuese. Kjo është të mbështesësh strehimin nëpërmjet taksave”, tha ai.

Rritja e interesit nga të huajt për blerjen e pronave në Shqipëri duhet të lidhet paralelisht dhe me një kualifikim më të mirë nga ana e agjentëve imobiliarë, shtoi Pipiria.

Ndryshimet në çmimin e referencës dhe taksimi i pasurive të paluajtshme po sjellin një klimë të re në tregun e pronave në Tiranë. Cilat do të jenë zhvillimet e radhës në këtë treg kaq dinamik? Për këtë mbetemi të gjithë kuriozë…

Për më shumë informacion rreth tregut imobiliar dhe shit-blerjes së pronave, ju ftojmë të vizitoni faqet tona online dhe rrjetet sociale, si dhe të na ndiqni në podcastet e radhës.

Future Home “Njerëzit, jo pronat”