Përfshirja e vajzave në fushën e Real Estate sot nuk është më tabu, por jo më larg se 7 vite më parë ky terren konsiderohej si një zonë e minuar, prej së cilës mund të dilnin fitimtarë vetëm djemtë. Paragjykimet ndaj profesioneve të konsideruara si për djem në Shqipëri duket se me kalimin e viteve janë zbutur, por jo pa sakrificë prej vajzave të para që me guxim janë vendosur në shtigje të tilla sfiduese, pavarësisht stigmave, ideve sipërfaqësore dhe gjykuese të mbështetura masivisht. Ajala Liçaj një nga vajzat pionere në fushën e Real Estate, tashmë Brokere e Future Home Liqeni, dikur agjentja më e suksesshme në rang kompanie për tre vite rresht, tregon me krenari në podcastin e dytë të Future Home se si bëri qëndresë në “industrinë e djemve”, siç njihej në vitin 2017.

Ndiq Future Home Podcast në Instagram

“Kur kam vënë këmbën në kompani industria e shitjes së pasurive të paluajtshme ishte një industri djemsh, jo vajzash. Fjalia e parë që më kanë thënë ka qenë: Kjo nuk është punë për vajza, por për djem. Kurse unë me mendje thoja: Mbajeni mend ju, do ta bëj kaq mirë këtë punë sa do të pendoheni. Vajzat që kishin provuar nuk ia kishin dalë me sukses në këtë industri në atë kohë, në 2017-ën. Më parë kisha shitur syze, kisha punuar në industrinë e call center për disa vite, por kishte dallim të madh shitja përballë, kontakti i drejtëpërdrëjtë me klientët nga shitja në telefon. Mendoj se po të jesh autoritare, serioze dhe bindëse nuk është dhe aq e vështirë që t`ia dalësh në këtë profesion edhe kur je vajzë”, tha Ajala, teksa ndau përvojën e saj të fillimeve në këtë profesion.

Ndiq episodin e dytë të podcastit këtu.

Pegi Xhani, e para Brokere grua në kryeqytet në rang kompanie, drejtuese e zyrës Future Home Myslym Shyri, ndau gjithashtu përvojën e saj të fillesave në këtë industri, ku nënvizoi gjithashtu se paragjykimet ishin të forta, madje edhe nga familjarë.

“Kam nisur në një kohë kur gratë ishin të pakta në këtë industri, në vitin 2018. Fillimet ishin të vështira, por kur kthej kokën dhe mendoj nuk e di nëse do të kisha mundur të bëja diçka tjetër. Ka patur paragjykime, që nga familjarët që më shihnin me skepticizëm sepse nuk ishte një industri e konsoliduar si sot. Për kryeqytetin kam qenë e para Brokere grua. Sot jemi katër vajza që drejtojmë zyrat në Tiranë, ndërsa dy të tjera drejtojnë zyrat në Durrës”, tha Pegi në podcast, e cila nënvizoi dhe se pjesa dërrmuese e bashkëpunëtorëve të saj kanë qenë vajza.

Për Romina Elezin, një prej 5 agjenteve më të suksesshme të Future Home, e cila pranon se rruga ishte hapur prej pararendëseve të saj në këtë industri, realiteti ka qenë më i thjeshtë në aspektin e paragjykimeve, pavarësisht se sfidat në profesion vijojnë të jenë të shumta edhe sot.

Vajzat në industrinë e Real Estate në Shqipëri. Sa paragjykohen ato? Ndiq podcastin e dytë të realizuar nga Future Home.

“Provova të punoja si asistente 6 muaj, por nuk ishte në natyrën time ai profil pune. Si agjente imobiliare nuk ke një limit. Nuk ke orare të përcaktuara pune apo kufizime në pagë. Megjithatë kjo nuk do të thotë se duhet të punosh pak. Nga 8 orë në fillimet e mia, kam kaluar në 12-16 orë në punë. Në dallim nga koleget, unë kam patur mbështetje nga meshkujt”, tregoi Romina për dallim nga Ajala, e cila shprehet se është përballur me një realitet tepër agresiv.

“Marrëdhëniet me meshkujt kanë qenë të tmerrshme. Unë isha shumë dominante në punë dhe kërkoja të arrija rezultate maksimale. Meshkujt në konkurrencë ishin tepër agresiv dhe nuk e pranonin që një femër të ishte mbi ata në rezultate”.

Sipas Ajalës vajzat janë më të dedikuara dhe kanë më shumë disiplinë në këtë profesion, por djemtë kanë një nuhatje më të mirë për të bërë biznes. Ajo tregon se ndjekja e axhendës me përpikëri ka qenë një prej avantazheve të saj konkurruese. Ndërsa si defekt më të madh të tyren konsideron faktin që vajzat nuk e respektojnë si duhet hierarkinë. Thyejnë më lehtë barrierat, socializohen dhe miqësohen me drejtuesen në këtë rast dhe sillen sikur ta kenë pjesë të familjes ose “ si shoqe”, duke kapërcyer disa limite të shëndetshme hierarkike.

Pegi Xhani, drejtuese e zyrës Future Home Myslym Shyri, tregon se në shumicën e kohës ka bashkëpunuar me vajza, por për të puna është më e thjeshtë me djemtë.

“Për rreth dy vjet e gjysmë kam menaxhuar një ekip vetëm me vajza. Prej gjashtë muajsh jam përballur me një përvojë të re, kam mirëpritur në zyrën time edhe 6 kolegë djem. Është më e vështirë të punosh me vajzat, kurse djemtë janë më të thjeshtë dhe praktikë”, tregoi ajo.

Pegi dhe Ajala tregojnë se shumë prej klientëve të tyre i kanë kthyer në miq tashmë, por sipas tyre disa sjellje etike janë të domosdoshme në momentin e parë të përballjes me një klient.

“Unë kam patur disa rregulla strikte. Në marrjen e pronës, kur ke dhe kontakt të drejtëpërdrejtë me klientin nuk duhet të shkosh asnjëherë vetëm sepse mund të qëlloni të jeni të dy vetëm në banesë dhe bëhet pak e sikletshme si situatë. Duhet të jesh patjetër me një koleg. Rregulli tjetër lidhet me etikën në veshje. Në fillim i merrja rrobat 2 numra më të mëdhenj që mos të ngjaja sensuale në sy të klientëve”, tregoi me shaka Ajala.

“Varet se si sillesh me një klient djalë. Nëse shkon serioze në tavolinë, e përgatitur dhe e mirëinformuar, ai nuk të shikon më si një vajzë, por si partnere biznesi. Nëse mban posturën e duhur nuk ka asnjë problem”, u shpreh Romina, e cila si agjente vijon t`i ketë edhe më të shpeshta takimet direkte me klientët gjatë rutinës së punës së saj.

Në Future Home mund të themi se ka ndodhur një revolucion, pasi në një terren që dikur dukej se i përjashtonte vajzat, sot ato zënë mbi 50% të vendeve të punës në të gjithë administratën e kompanisë.

Pavarësisht tejkalimeve të shumë paragjykimeve, për vajzat në këtë industri sipas Ajalës mbetet sfidues menaxhimi i raporteve në partneritet.

“Ndikon në raportet në çift të qenit pjesë e kësaj industrie sepse je në takim me shumë djem dhe kjo gjë nuk mirëpritet nga partnerët. E shohin me skepticizëm këtë gjë. Mendoj se mosha ideale për ta nisur këtë punë është 24-25 vjeç sepse autoriteti vjen edhe me kalimin e moshës. Unë në 5 vitet e para të punës nuk kam jetuar, por kam ekzistuar. Çdokush që do të bëhet pjesë e kësaj fushe duhet të ketë disiplinë ekstreme, të bëjë çdo gjë që i thotë Brokeri dhe të përgatitet që për 5 vite të mos bëjë qejf”.

Pegi Xhani gjithashtu u sugjeron vajzave të bëhen pjesë e kësaj industrie për shkak të pavarësisë ekonomike që të jep ky profesion, por edhe sepse kjo është një punë ku oraret, bashkë me axhendën mund t`i krijosh vetë.

“Mund të ngresh një biznes me kapital fillestar zero”, u shpreh ajo.

Nëse për vajzat përfshirja në këtë industri vetëm 7 vite më parë shihej si një akt trimërie, sot shifrat tregojnë se numerikisht ato po kalojnë në avantazh dhe se puna si agjente imobiliare është tashmë një punë grash, po aq sa dhe punë burrash.

Për më shumë informacion rreth tregut imobiliar dhe shit-blerjes së pronave, ju ftojmë të vizitoni faqet tona online dhe rrjetet sociale, si dhe të na ndiqni në podcastet e radhës.

Future Home “Njerëzit, jo pronat”